ກອງປະຊຸມສຳມະນາວິທະ ຍາສາດສາກົນ ວ່າດ້ວຍສື່ມວນຊົນຕໍ່ການປ່ຽນແປງຂອງສະ ພາບດິນຟ້າອາກາດໃນເຂດແມ່ ນ້ຳຂອງຕອນລຸ່ມ ໄດ້ຈັດຂຶ້ນໃນວັນທີ 29-30 ພະຈິກແລ້ວນີ້ ຢູ່ນະ ຄອນຫລວງຮ່າໂນ້ຍ ໂດຍສະຖາບັນສື່ມວນຊົນ ແລະ ການໂຄສະ ນາ ສສ ຫວຽດນາມ ເຊິ່ງໄດ້ຮັບການສະໜັບສະໜູນຈາກອົງການ FRIEDRICHEDERTSTIFTLING ແຫ່ງສະຫະພັນເຢຍລະມັນ ໂດຍການເຂົ້າຮ່ວມຂອງຜູ້ຕາງໜ້າສື່ມວນຊົນຈາກ ສປປ ລາວ ນຳໂດຍທ່ານ ວິໄລທອງ ສີຊານົນ ຫົວໜ້າສະຖາບັນສື່ມວນຊົນ ແລະ ວັດທະນະທຳ ແລະ ຜູ້ຕາງໜ້າສື່ມວນຊົນກຳປູເຈຍ, ສປ ຈີນ ແລະ ຜູ້ຕາງໜ້າທະນາຄານພັດທະນາອາຊີປະຈຳພາກພື້ນ ພ້ອມດ້ວຍຜູ້ຕາງໜ້າອົງການຈັດຕັ້ງສາກົນອື່ນໆທີ່ມີສຳນັກງານຕັ້ງຢູ່ຫວຽດນາມ.
ກອງປະຊຸມສຳມະນາດັ່ງກ່າວດຳເນີນໄປດ້ວຍບັນຍາກາດຟົດ ຟື້ນຈາກການລາຍງານບົດສຶກ ສາຄົ້ນຄວ້າຂອງບັນດານັກວິທະ ຍາສາດ ແລະ ຜູ້ມີປະສົບການຕ່າງໆກ່ຽວກັບສະພາບປ່ຽນແປງຂອງດິນຟ້າອາກາດທີ່ພວມສົ່ງຜົນກະທົບໜັກຕໍ່ໂລກພວກເຮົາເຊັ່ນ: ອຸນຫະພູມເພີ່ມຂຶ້ນ, ສະພາບແຫ້ງແລ້ງແກ່ຍາວ ຫລື ໄພນ້ຳຖ້ວມ, ແຜ່ນດິນໄຫວ ອັນໄດ້ຂ້າຊີວິດຂອງຄົນເຮົາໄປຈົນນັບບໍ່ຖ້ວນ, ສົ່ງຜົນກະທົບຕໍ່ເສດ ຖະກິດຂອງຊາດ ແລະ ສິ່ງດັ່ງ ກ່າວມັນເກີດຂຶ້ນກໍຍ້ອນເງື່ອມມືຂອງມະນຸດຄົນເຮົາ. ດັ່ງນັ້ນ ສື່ມວນຊົນພວກເຮົາຈະຕ້ອງໄດ້ເພີ່ມທະວີການໂຄສະນາປຸກ ລະ ດົມໃຫ້ປະຊາຊົນປະເທດເຮົາຂອງຕົນໃຫ້ຮູ້ຈັກປົກປັກຮັກສາສິ່ງແວດລ້ອມໃຫ້ດີ, ກຳຈັດການຕັດໄມ້ທຳລາຍປ່າ ແລະ ອື່ນໆໃຫ້ມີປະສິດທິຜົນສູງຂຶ້ນ. ດັ່ງບົດຄຳເຫັນຂອງທ່ານ ຮອງສາສະດາຈານ ດຣ. ເຈືອງຫງ໋ອກນາມ ອຳ ນວຍການໃຫຍ່ສະຖາບັນສື່ມວນຊົນ ແລະ ການໂຄສະນາ ສສ ຫວຽດນາມ ໄດ້ເນັ້ນວ່າ: ດ້ວຍພາ ລະບົດບາດເປັນຜູ້ຕອບສະໜອງຂໍ້ມູນຂ່າວສານ ແລະ ການນຳຫາງສຽງສັງຄົມໃນໄລຍະຜ່ານມາ, ກຳລັງສື່ມວນຊົນພວກເຮົາກໍໄດ້ຮັບການພັດທະນາຂະຫຍາຍຕົວກວ້າງຂວາງ ນັບທັງທາງກວ້າງ ແລະ ທາງເລິກຂອງມັນ ແລະ ສາມາດສ້າງເງື່ອນໄຂ, ອຳນວຍຄວາມສະດວກໃຫ້ແກ່ມະນຸດເຮົາສາມາດເຂົ້າເຖິງ ແລະ ຮັບເອົາຂໍ້ມູນຂ່າວສານຕ່າງໆໄດ້ຢ່າງກວ້າງຂວາງໃນທຸກໆຂົງເຂດໃນຊີວິດ-ສັງຄົມຂອງຕົນ. ພິເສດກໍແມ່ນຂໍ້ມູນຂ່າວສານຂອງການປ່ຽນແປງດິນຟ້າອາກາດຜ່ານພາຫະນະສື່ມວນຊົນໄດ້ຢ່າງວ່ອງໄວທັນການ, ແຕ່ສື່ມວນຊົນຕ້ອງເຮັດແນວໃດໃຫ້ປະຊາຊົນຂອງຕົນຮັບຮູ້ ແລະ ເຂົ້າໃຈຕໍ່ໄພທຳມະຊາດທີ່ອາດຈະເກີດຂຶ້ນຈາກການປ່ຽນແປງດິນຟ້າອາກາດດັ່ງກ່າວເຊັ່ນ: ໄພນ້ຳຖ້ວມ, ດິນເຈື່ອນ, ແຜ່ນດິນໄຫວ ຫລື ສະ ພາບແຫ້ງແລ້ງ ອັນເປັນໄພຄຸກຄາມຕໍ່ຊີວິດຂອງຄົນເຮົາ. ທ່ານ ຮອງສາສະດາຈານ ດຣ. ເຈືອງຫງ໋ອກນາມ ຍັງໄດ້ຍົກໃຫ້ເຫັນວ່າ: ຜ່ານມາກຳລັງສື່ມວນຊົນພວກເຮົາພຽງສຸມໃສ່ໂຄສະນາຕໍ່ຜົນກະທົບຂອງໄພທຳມະຊາດດັ່ງກ່າວເທົ່ານັ້ນ ເຊິ່ງຍັງບໍ່ໄດ້ລົງເລິກເຖິງການໂຄສະນາໃຫ້ແກ່ການປູກຈິດສຳນຶກໃນການປົກປັກຮັກສາສະພາບແວດລ້ອມ ເພື່ອສະກັດກັ້ນ ແລະ ຈຳກັດການປ່ຽນແປງຂອງສະພາບດິນຟ້າອາກາດລົງໄດ້. ດັ່ງນັ້ນ ກອງປະ ຊຸມສຳມະນາເທື່ອນີ້ ຈຶ່ງມີຄວາມສຳຄັນຍິ່ງໃນການກະຕຸກຊຸກຍູ້ໃຫ້ສື່ມວນຊົນພວກເຮົາຈົ່ງເພີ່ມທະວີໂຄສະນາເພື່ອສະກັດກັ້ນ ແລະ ຕ້ານການປ່ຽນແປງຂອງສະພາບດິນຟ້າອາກາດໃຫ້ມີປະສິດທິຜົນສູງຂຶ້ນກວ່າເກົ່າ.
ໃນກອງປະຊຸມສຳມະນາດັ່ງ ກ່າວ, ຄະນະຜູ້ແທນລາວກໍໄດ້ມີຄຳເຫັນເຖິງຂະບວນການຕ້ານການປ່ຽນແປງຂອງສະພາບດິນຟ້າອາກາດຢູ່ລາວພວກເຮົາ ໂດຍສະເພາະການປະກອບສ່ວນໂຄ ສະນາຂອງສື່ມວນຊົນໃນການປຸກລະດົມໃຫ້ປະຊາຊົນຮູ້ຈັກປົກປັກຮັກສາສິ່ງແວດລ້ອມ, ຈຳກັດການຕັດໄມ້ທຳລາຍປ່າ, ປຸກລະ ດົມໃຫ້ປະຊາຊົນເຂດຊົນນະບົດຢຸດການຖາງປ່າເຮັດໄຮ່ຢ່າງຖາ ວອນ ແລະ ຫັນມາປູກໄມ້ອຸດສາຫະກຳ ແລະ ພືດທີ່ເປັນສິນຄ້າໃຫ້ຫລາຍຂຶ້ນ. ແຕ່ເຖິງແນວໃດກໍດີ, ເພື່ອຕໍ່ສູ້ກັບການປ່ຽນແປງດິນຟ້າອາກາດໃຫ້ມີປະສິດທິຜົນສູງຂຶ້ນນັ້ນ, ທຸກປະເທດໃນໂລກຕ້ອງໄດ້ຮ່ວມມືກັນປົກປັກຮັກສາສະພາບແວດລ້ອມໃຫ້ດີກວ່າເກົ່າ ໂດຍສະເພາະກຳ ລັງສື່ມວນຊົນພວກເຮົາຕ້ອງເຮັດແນວໃດເພື່ອສຸມໃສ່ໂຄສະນາບັນ ຫານີ້ໃຫ້ຫລາຍ ແລະ ເລິກເຊິ່ງ ເພື່ອປະຊາຊົນຂອງຕົນໄດ້ຮັບຮູ້ ແລະ ເຂົ້າໃຈປະຕິບັດຕາມ.
No comments:
Post a Comment