ເຖົ້າແກ່ບູຮານເພິ່ນເວົ້າວ່າ ຖ້າປີໃດ ການແຂ່ງຂັນຕີຄີ ຝ່າຍປະຊາຊົນ ເອົາຊະນະ ຝ່າຍພະນັກ ງານໄດ້ ບ້ານເມືອງ ຈະຢູ່ເຢັນເປັນສຸກ ເຊິ່ງການແຂ່ງຂັນຕີຄີ ໃນງານບຸນນະມັດສະການພະ ທາດຫລວງວຽງຈັປະຈຳ ພສ 2555 ນີ້ ຝ່າຍປະຊາຊົນຍັງເຂັ້ມແຂງສາມາດເອົາຊະນະ ຝ່າຍພະ ນັກງານ ໄປໄດ້ 5-4 ປະຕູ.
ບຸນນະມັດສະການພະທາດຫລວງວຽງຈັນ ໃນທຸກໆປີ ພໍມາເຖິງມື້ສຸດທ້າຍ ຄືມື້ຂຶ້ນ 15 ຄ່ຳ ເດືອນ 12 ລາວ ຕອນກາງເວັນ ໄດ້ມີການແຂ່ງຂັນກິລາຕີຄີຢູ່ບໍລິເວນເດີ່ນພະທາດຫລວງວຽງຈັນ ເຊິ່ງປີນີ້ ແມ່ນທ່ານ ສົມວັນດີ ນາຖາວົງ, ຮອງເລຂາພັກນະຄອນ ຫລວງວຽງຈັນ, ຮອງເຈົ້າຄອງນະຄອນຫລວງວຽງຈັນ ແລະ ທ່ານ ຖະໜອມ ທຳທອງ, ເຈົ້າເມືອງໄຊເຊດຖາ ໃຫ້ກຽດ ເຂ່ຍລູກຄີ ໂດຍມີ ມວນຊົນຊາວ ນະ ຄອນຫລວງ, ຕ່າງແຂວງ ແລະ ຊາວຕ່າງປະເທດເຂົ້າຮ່ວມຊົມຢ່າງຄັບຄາໜາແໜ້ນ.
ການແຂ່ງຂັນຕີຄີ ຄັ້ງນີ້ ກໍເໝືອນກັບປີຜ່ານໆມາ ທີ່ໄດ້ສ້າງຄວາມປະທັບໃຈໃຫ້ແກ່ຜູ້ເບິ່ງ ຜູ້ຊົມ ເຊິ່ງຝ່າຍປະຊາຊົນ ແລະ ຝ່າຍພະນັກງານ ຕ່າງຝ່າຍຕ່າງສູ້ກັນຢ່າງສຸດຄວາມສາມາດ. ແຕ່ສຸດທ້າຍ ກໍຍັງບໍ່ເໝືອຄວາມແຂງແຮງຂອງຝ່າຍປະຊາຊົນ ສາ ມາດເອົາຊະນະ ຝ່າຍພະນັກງານໄປໄດ້ 5-4 ປະຕູ ເປັນອັນວ່າ ປີນີ້ ບ້ານເມືອງ ຢູ່ເຢັນເປັນສຸກ ບໍ່ອຶດເຂົ້າ ບໍ່ອຶດປາ ມີເຂົ້າເຕັມນາ ປາເຕັມໜອງເສດຖະກິດ ຈະເລີນຮຸ່ງເຮືອງ ບ້ານເມືອງ ມີຄວາມສະ ຫງົບປອດໄພ ການທຳມາຫາກິນ ມີແຕ່ຄວາມລາບລື້ນ ແລະ ບ້ານເມືອງ ຈະມີຄວາມຈະເລີນຮຸ່ງເຮືອງ ສີວິໄລ ຂຶ້ນໄປເລື້ອຍໆ.
ກ່ອນຈະມີການແຂ່ງຂັນກິລາຕີຄີນີ້ ບັນດາຜູ້ເຖົ້າແກ່ແນວໂຮມ ອາຈານ ແມ່ນໄດ້ພ້ອມກັນຈັດໃຫ້ມີທາງຮີດຄອງປະເພນີເໝືອນທຸກໆປີ ເພື່ອອັນເຊີນລູກຄີລົງມາ ແລ້ວແຫ່ອ້ອມກົມມະລຽນພະ ທາດຫລວງ 3 ຮອບ ຈາກນັ້ນ ຈຶ່ງມີການແຂ່ງຂັນຕີຄີ ເມື່ອແຂ່ງຂັນສຳເລັດແລ້ວ ກໍໄດ້ແຫ່ລູກກັບຄືນ ແລະ ອັນເຊີນລູກຄີໄວ້ຄືເກົ່າ ເຊິ່ງໄດ້ບົ່ງບອກເຖິງຄວາມສັກສິດຕາມການເຊື່ອຖືກັນມາຕັ້ງແຕ່ບູຮານນະການ.
No comments:
Post a Comment