ແນວຄວາມຄິດລິເລີ່ມການສ້າງຕັ້ງກອງທຶນພັດທະນາບ້ານແມ່ນຖືກສອດຫ້ອຍເຂົ້າກັບແຜນຍຸດທະສາດເພື່ອການເຕີບໃຫຍ່ ແລະ ລຶບລ້າງຄວາມທຸກຍາກແຫ່ງຊາດ ໃນປີ 2003 ໂດຍໄດ້ກຳນົດເອົາ 72 ເມືອງ ເປັນເມືອງທຸກຍາກ, ໃນນັ້ນ 47 ເມືອງ ເປັນເມືອງທຸກຍາກສຸດ. ຜ່ານການສຳຫລວດພົບວ່າ: ສາເຫດຕົ້ນຕໍທີ່ພາໃຫ້ປະຊາຊົນມີຄວາມທຸກຍາກ ແມ່ນຍ້ອນຂາດທຶນຮອນ ເພື່ອເຮັດການຜະລິດ ເນື່ອງຈາກບໍ່ສາມາດເຂົ້າເຖິງລະບົບສິນເຊື່ອ ຫລື ຖ້າເຂົ້າເຖິງກໍມີອັດຕາດອກເບັ້ຍສູງ ລວມເຖິງເງື່ອນໄຂກູ້ຢືມມີການຜູກມັດຫລາຍຢ່າງ ຍ້ອນເຫັນໄດ້ຄວາມຈຳເປັນຄືແນວນັ້ນ, ລັດຖະບານຈຶ່ງໄດ້ຕັດສິນໃຈຈັດສັນງົບປະ ມານແບ່ງປັນໃຫ້ 47 ເມືອງທຸກຍາກ ເພື່ອປະກອບສ້າງເປັນກອງ ທຶນໝູນວຽນຂັ້ນບ້ານໃຫ້ປະຊາ ຊົນຜູ້ທຸກຍາກໄດ້ກູ້ຢືມໂດຍກົງ ໄປເຮັດການຜະລິດເພື່ອສ້າງລາຍຮັບໃຫ້ແກ່ຄອບຄົວຕາມເງື່ອນໄຂ ແລະ ທ່າແຮງຂອງຕົນ ໂດຍແນໃສ່ເຮັດໃຫ້ປະຊາຊົນມີອາຊີບ, ມີການຜະລິດທີ່ໝັ້ນຄົງແລະ ຄ່ອຍໆ ຫລຸດພົ້ນອອກຈາກຄວາມທຸກຍາກເທື່ອລະກ້າວ.
ລະບຽບຂອງການປ່ອຍສິນເຊື່ອມີຄື ໄລຍະເວລາການກູ້ຢືມແມ່ນ 6 ເດືອນຫາໜຶ່ງປີ, ອັດຕາດອກເບັ້ຍ 6-8% ຕໍ່ປີ. ໃນກໍລະນີເຈັບເປັນແມ່ນປ່ອຍກູ້ບໍ່ມີດອກເບັ້ຍ 3 ເດືອນ ແລະ ກິດຈະກຳເປົ້າໝາຍຂອງການປ່ອຍສິນເຊື່ອແມ່ນການປູກຝັງ-ລ້ຽງສັດ, ຫັດ ຖະກຳ, ອຸດສາຫະກຳປຸງແຕ່ງສະບຽງອາຫານຈາກຜົນຜະລິດກະສິກຳ, ການບຸກເບີກເນື້ອທີ່ການຜະລິດ, ການບໍລິການ ແລະ ກິດຈະກຳອື່ນໆ.
ເລີ່ມແຕ່ປີ 2003-2012 ສາມາດສ້າງຕັ້ງກອງທຶນພັດທະນາຂັ້ນ ບ້ານໄດ້ 528 ບ້ານໃນ 16 ແຂວງ, 1 ນະຄອນຫລວງວຽງຈັນ, ມີທຶນໝູນວຽນ 42 ຕື້ກວ່າກີບ, ມີສະ ມາຊິກກອງທຶນປະມານ 34 ພັນກວ່າຄອບຄົວ ໃນນີ້ກິດຈະກຳປູກຝັງປະມານ 7 ພັນກວ່າຄອບ ຄົວ ເປັນເງິນປະມານ 9 ຕື້ກວ່າກີບ, ລ້ຽງສັດ 11 ພັນກວ່າຄອບ ຄົວ ເປັນເງິນ 16 ຕື້ກວ່າກີບ, ຫັດ ຖະກຳປະມານ 990 ກວ່າຄອບ ຄົວ ເປັນເງິນ 800 ລ້ານກວ່າກີບ ແລະ ກິດຈະກຳອື່ນໆປະມານ 4 ຕື້ກວ່າກີບ.
ຜ່ານການຕິດຕາມກວດກາ ແລະ ຕີລາຄາຂອງຄະນະວິຊາການຂັ້ນສູນກາງ ມີຫລາຍກອງທຶນໄດ້ເຄື່ອນໄຫວມີປະສິດທິຜົນສູງ ແລະ ມີບາງກອງທຶນໄດ້ຂະ ຫຍາຍຕົວກ້າວຂຶ້ນເປັນສະຫະ ກອນສິນເຊື່ອເຊັ່ນ: ກອງທຶນບ້ານດອນຈັນ, ນາເລົ່າ ເມືອງນາແລ, ບ້ານຊຽງກົກ ເມືອງລອງ ແຂວງຫລວງນ້ຳທາ ແລະ ກອງທຶນອື່ນໆ. ຄອບຄົວສະມາຊິກກອງທຶນໄດ້ຫລຸດພົ້ນອອກຈາກຄວາມ ທຸກຍາກກ້າວຂຶ້ນເປັນຄອບຄົວມີຢູ່ມີກິນ ແລະ ຫລາຍຄອບຄົວໄດ້ກາຍເປັນຄອບຄົວຕົວແບບຜະລິດສິນຄ້າດ້ານຕ່າງໆ ຄືຄອບຄົວແບບຢ່າງດ້ານການປູກຝັງມີ 13 ຄອບຄົວ, ດ້ານການລ້ຽງສັດ 30 ຄອບຄົວ, ຫັດຖະກຳ 3 ຄອບຄົວ ແລະ ດ້ານກິດຈະກຳອື່ນໆ 22 ຄອບຄົວ.
ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ ໃຫ້ຮູ້ວ່າ: ການສ້າງ ຕັ້ງກອງທຶນບ້ານໄດ້ເຮັດໃຫ້ປະ ຊາຊົນບັນດາເຜົ່າເຫັນໄດ້ຄວາມເປັນຫ່ວງເປັນໄຍຂອງພັກ-ລັດຕໍ່ຊີວິດການເປັນຢູ່ຂອງເຂົາເຈົ້າ ແລະ ມີຄວາມເຊື່ອໝັ້ນຕໍ່ແນວ ທາງນະໂຍບາຍ. ສິ່ງສຳຄັນເຂົາເຈົ້າເຫັນວ່າ: ກອງທຶນພັດທະນາບ້ານໄດ້ລົງເຖິງການຜະລິດຕົວຈິງຂອງປະຊາຊົນ ເຊິ່ງໄດ້ສ້າງເງື່ອນໄຂອັນສະດວກໃນການພັດ ທະນາບ້ານ, ຄອບຄົວທຸກຍາກໄດ້ມີໂອກາດເຂົ້າເຖິງແຫລ່ງທຶນດອກເບັ້ຍຕ່ຳ ແລະ ໄດ້ກູ້ຢືມໄປເຮັດການຜະລິດ ຫລື ການບໍລິ ການຂະໜາດນ້ອຍ, ສ້າງລາຍຮັບຕົວຈິງໃຫ້ແກ່ຄອບຄົວ ເຮັດໃຫ້ຄຸນນະພາບຊີວິດການເປັນຢູ່ດີຂຶ້ນ, ຫລຸດພົ້ນອອກຈາກຄວາມ ທຸກຍາກ ແລະ ສິ່ງສຳຄັນໜຶ່ງແມ່ນເຮັດໃຫ້ປະຊາຊົນຮູ້ຈັກນຳໃຊ້ ແລະ ບໍລິຫານເງິນເຂົ້າໃນການຜະລິດຢ່າງມີປະສິດທິຜົນ.
No comments:
Post a Comment