ນັບວ່າເປັນຄະດີອຸທາຫອນໜຶ່ງສຳລັບຜູ້ທີ່ມີອາຊີບຂັບລົດຕຸກໆ-ຈຳໂບ້ ຢູ່ໃນຕົວເມືອງ, ຫລັງຈາກເມື່ອບໍ່ດົນມານີ້ ໄດ້ເກີດເຫດຜິດຖຽງກັນ ລະຫວ່າງຜູ້ໂດຍສານກັບຜູ້ຂັບລົດໂດຍ ສານກ່ຽວກັບເລື່ອງຄ່າລົດແພງຈົນກ້າວໄປເຖິງການທຳຮ້າຍຮ່າງກາຍຈົນເສຍຊີວິດ.
ກອງບັນຊາການ ປກສ ນະຄອນຫລວງວຽງຈັນ ໃຫ້ຮູ້ວ່າ: ເຫດການດັ່ງກ່າວເກີດຂຶ້ນເວລາປະມານ 2 ໂມງກາງຄືນ ຂອງວັນທີ 24 ພະຈິກ 2012, ພາຍຫລັງເຈົ້າໜ້າທີ່ໄດ້ຮັບແຈ້ງຈາກພົນລະເມືອງດີວ່າເກີດມີການທຳຮ້າຍຮ່າງກາຍໃນເຂດບ້ານອຸບມຸງ ເມືອງສີໂຄດຕະບອງ ນະຄອນຫລວງວຽງຈັນ, ເຈົ້າໜ້າທີ່ຈຶ່ງໄດ້ຮີບຮ້ອນຈັດກຳ ລັງລົງກວດກາສະຖານທີ່ເກີດເຫດ ຈຶ່ງພົບເຫັນຜູ້ເສຍຊີວິດຊື່ທ້າວ ສີສະໝຸດ ອາຍຸ 30 ປີ ອາຊີບຂັບລົດຈຳໂບ້ ຢູ່ບ້ານຮ່ອງຄ້າ ເມືອງຈັນທະບູລີ ນະຄອນຫລວງວຽງຈັນ ເສຍຊີວິດຍ້ອນຖືກແທງດ້ວຍມີດຢູ່ບໍລິເວນໜ້າເອິກ 2 ຈຸດ ແລະ ທ້ອງ 1 ຈຸດ ສາມາດກັກຜູ້ທີ່ລົງມືແທງ ຄືທ້າວ ສີວຽງແກ້ວ ອາຍຸ 27 ປີ ອາຊີບຫວ່າງວຽກ ຢູ່ບ້ານໜອງປີງ ເມືອງຈັນ ທະບູລີ ນະຄອນຫລວງວຽງຈັນ.
ຜ່ານການສືບສວນ-ສອບສວນຂອງເຈົ້າໜ້າທີ່ຮູ້ວ່າ: ທ້າວ ສີວຽງແກ້ວ ຢູ່ຮ້ານເບຍແຫ່ງໜຶ່ງ, ແຕ່ເມື່ອຈະກັບເຮືອນ ຜູ້ກ່ຽວໄດ້ເຮັດກະແຈລົດໃຫຍ່ເສຍ, ຈາກນັ້ນ ຈຶ່ງໄດ້ຈ້າງລົດຈຳໂບ້ຂອງທ້າວ ຄຳໄພ່ ເມືອບ້ານໃນລາຄາ 50 ພັນກີບ, ແຕ່ພໍຂີ່ມາຮອດຫ້ອງການບ້ານອຸບມຸງ, ທ້າວ ສີວຽງແກ້ວ ຈຶ່ງໄດ້ຜິດຖຽງກັບທ້າວ ຄຳໄພ່ ກ່ຽວກັບເລື່ອງຄ່າຈຳໂບ້ແພງໂພດ ແລະ ທ້າວ ສີວຽງແກ້ວ ໄດ້ຈົກມີດອອກມາ, ທ້າວ ຄຳໄພ່ ຈຶ່ງໄດ້ໂດດອອກຈາກລົດ ແລະ ໂທ ລະສັບຫາໝູ່ທີ່ຂັບລົດຈຳໂບ້ຢູ່ເຂດຫລັກສອງມາຊ່ວຍ ຊື່ທ້າວ ເດືອນ ແລະ ທ້າວ ສີສະໝຸດ, ພໍມາເຖິງທ້າວ ສີສະໝຸດ ເຫັນທ້າວ ສີວຽງແກ້ວ ຈັບມີດຢູ່ ຜູ້ກ່ຽວຈຶ່ງໄດ້ຈັບເອົາເຫລັກແປັບທີ່ຢູ່ໃນລົດຈຳໂບ້ ລົງໄປນຳ, ສ່ວນທ້າວ ສີວຽງແກ້ວ ເຫັນທ້າວ ສີສະໝຸດ ຖືເຫລັກແປັບ ກໍໄດ້ຖືມີດຍ່າງເຂົ້າໄປຫາ. ໃນຂະນະນັ້ນ ທ້າວ ສີສະໝຸດ ໄດ້ຫຍັບຖອຍຫລັງແລ້ວພາດທ່າລົ້ມລົງໃສ່ໂອງດອກໄມ້. ສະ ນັ້ນ ຈຶ່ງເຮັດໃຫ້ທ້າວ ສີວຽງແກ້ວ ໄດ້ໂອກາດແລ່ນເຂົ້າໄປເອົາມີດແທງບໍລິເວນໜ້າເອິກ 2 ເທື່ອ ແລະ ທ້ອງ 1 ເທື່ອ ຈົນເສຍຊີວິດ. ປັດຈຸບັນ ທ້າວ ສີວຽງແກ້ວ ໄດ້ຖືກເຈົ້າໜ້າທີ່ກັກຕົວ ເພື່ອດຳເນີນຄະດີຕາມລະບຽບກົດໝາຍ.
No comments:
Post a Comment