ວັນທີ 2 ທັນວາ ແມ່ນວັນທີ່ມີຄວາມໝາຍຄວາມສຳຄັນສຳລັບທົ່ວພັກ, ທົ່ວລັດ ແລະ ທົ່ວປວງຊົນລາວ, ວັນສະຖາປະນາ ສາທາລະນະລັດ ປະຊາທິ ປະໄຕ ປະຊາຊົນລາວ, ວັນຊາດຂອງລາວຄົບຮອບ 37 ປີ.
ວັນທີ 2 ທັນວາ 1975 ແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ເປັນ ພັນໆປີຂອງຊາດລາວເຮົາ, ແມ່ນວັນທີ່ປະຊາຊົນ ລາວບັນດາເຜົ່າໄດ້ມີອິດສະລະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ, ແມ່ນວັນທີ່ປະເທດລາວໄດ້ມີເອກະລາດຢ່າງສົມບູນ ແລະ ມີອະທິປະໄຕຢ່າງຄົບຖ້ວນ, ມີທີ່ຕັ້ງ ອັນສົມກຽດ ແລະ ມີສະຖານະເທົ່າທຽມກັບປະເທດອື່ນໆໃນເວທີປະຊາຄົມໂລກ.
ວັນທີ 2 ທັນວາ ແມ່ນວັນແຫ່ງສັນຕິພາບ ແມ່ນວັນແຫ່ງການກ້າວສູ່ຍຸກສະໄໝໃໝ່ແຫ່ງການສ້າງປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອ ກະພາບ, ວັດທະນາຖາວອນ.
ປະທານ ໄກສອນ ພົມວິຫານ ໄດ້ຕີລາຄາ ວັນທີ 2 ທັນວາ 1975 ວ່າ: “ບໍ່ທັນມີເວລາໃດທີ່ປະຊາຊົນເຮົາ ເຊິ່ງເປັນຜູ້ສ້າງປະຫວັດສາດຂອງຊາດນັ້ນໄດ້ຍາດເອົາໄຊຊະ ນະສົມບູນ, ເຖິງຖອງ ແລະ ບໍລິ ບູນໄດ້ຢ່າງສະຫງ່າລາສີຄືແນວນີ້ຈັກເທື່ອ. ໄຊຊະນະນັ້ນບໍ່ສະເພາະແຕ່ໄດ້ຟື້ນຟູຄວາມເປັນເອ ກະລາດຂອງປະເທດເຮົາ, ຫາກຍັງເປັນເທື່ອທຳອິດທີ່ປະຊາຊົນບັນດາຊົນຊາດເຮົາຜູ້ເຄີຍດຳລົງຊີວິດເປັນທາດ ໄດ້ກາຍມາເປັນເຈົ້າຂອງແທ້ຈິງຂອງຊາດໜຶ່ງ ທີ່ມີເອກະລາດ, ມີອິດສະລະພາບ ຢ່າງສົມບູນ ແລະ ພວມກ້າວຂຶ້ນສູ່ສັງຄົມນິຍົມ ເຮັດໃຫ້ຄວາມມຸ່ງຫວັງອັນແຮງກ້າຂອງປວງຊົນລາວ ກໍຄືຂອງມວນມະນຸດປາກົດເປັນຈິງຢູ່ບົນຜືນແຜ່ນດິນອັນແສນຮັກຂອງພວກເຮົາ”.
ການສະເຫລີມສະຫລອງວັນທີ 2 ທັນວາ 2012 ແມ່ນຢູ່ໃນໄລຍະທີ່ພວກເຮົາພວມສຸມໃສ່ຈັດຕັ້ງ ປະຕິບັດມະຕິກອງປະຊຸມໃຫຍ່ຄັ້ງທີ IX ຂອງພັກ, ແຜນພັດທະ ນາເສດຖະກິດ-ສັງຄົມ 5 ປີ ຄັ້ງທີ VII ຂອງລັດ ໂດຍສະເພາະເປັນປີທີ່ພວກເຮົາລິເລີ່ມການຈັດຕັ້ງ ປະຕິບັດທົດລອງວຽກງານ 3 ສ້າງໃນຂອບເຂດທົ່ວປະເທດ; ປີ 2012 ຍັງເປັນປີແຫ່ງຄວາມສາ ມັກຄີມິດຕະພາບ ລາວ-ຫວຽດ ນາມ ແລະ ເປັນປີທີ່ ສປປ ລາວ ເປັນເຈົ້າພາບຈັດກອງປະຊຸມລັດ ຖະສະພາ ອາຊີ-ເອີຣົບ (ອາແຊັບ) ຄັ້ງທີ 7 ແລະ ກອງປະຊຸມສຸດຍອດ ອາຊີ-ເອີຣົບ (ອາເຊັມ) ຄັ້ງທີ 9 ເຊິ່ງທັງສອງກອງປະຊຸມປະ ຫວັດສາດດັ່ງກ່າວໄດ້ດຳເນີນໄປດ້ວຍຜົນສຳເລັດອັນຈົບງາມ ເຮັດໃຫ້ບັນດາຜູ້ແທນທີ່ມາຮ່ວມໄດ້ຮັບຮູ້, ເຂົ້າໃຈ ແລະ ເຫັນແຈ້ງບົດ ບາດ ສປປ ລາວ ຂຶ້ນຕື່ມ, ເພີ່ມຄວາມເຊື່ອຖື, ຄວາມໄວ້ເນື້ອເຊື່ອໃຈຈາກວົງຄະນາຍາດສາກົນທີ່ມີຕໍ່ພັກ, ລັດ ແລະ ປະຊາຊົນລາວ ເຮັດໃຫ້ຖານະບົດບາດຂອງ ສປປ ລາວ ຖືກຍົກສູງຂຶ້ນຕື່ມໃນເວທີສາກົນ.
ປີ 2011-2012 ເປັນປີທີ່ຫຍຸ້ງ ຍາກ, ສະພາບແວດລ້ອມພາຍນອກມີວິກິດການດ້ານເສດຖະ ກິດ-ການເງິນ, ພາຍໃນປະເທດເຮົາກໍປະສົບກັບໄພທຳມະຊາດ ເຊິ່ງມັນໄດ້ສົ່ງຜົນກະທົບຫລາຍດ້ານໃຫ້ແກ່ພວກເຮົາ, ແຕ່ປະເທດເຮົາກໍສາມາດພັດທະນາໃນຈັງ ຫວະອັນໝັ້ນທ່ຽງ-ຕໍ່ເນື່ອງ. ລວມ ຍອດຜະລິດຕະພັນພາຍໃນ(GDP) ບັນລຸໄດ້ 8,1%, ປະຕິບັດງົບປະ ມານໄດ້ເກີນແຜນການ, ເງິນຕາແຫ່ງຊາດມີຄວາມໝັ້ນທ່ຽງ, ອັດ ຕາເງິນເຟີ້ຢູ່ໃນລະດັບຕ່ຳ ສະເລ່ຍ ໝົດສົກປີແມ່ນ 7,42% ມັນໄດ້ສ້າງພື້ນຖານ ແລະ ທ່ວງທ່າສຳ ລັບການສືບຕໍ່ເຮັດສຳເລັດຄາດ ໝາຍທີ່ກອງປະຊຸມໃຫຍ່ຄັ້ງທີ IX ວາງອອກ.
37 ປີຜ່ານມາ, ປະຊາຊົນລາວບັນດາເຜົ່າໄດ້ພ້ອມພຽງສາມັກຄີກັນພາຍໃຕ້ການນຳພາຂອງພັກ ປະຕິບັດສອງໜ້າທີ່ຍຸດທະສາດ ປົກປັກຮັກສາ ແລະ ສ້າງສາປະເທດຊາດ ເຊິ່ງເຮັດໃຫ້ ສປປ ລາວ ໄດ້ມີການພັດທະນາ ແລະ ເຕີບໃຫຍ່ຂະຫຍາຍຕົວຢ່າງຮອບ ດ້ານ.
ການພັດທະນາເສດຖະກິດ-ສັງ ຄົມຂອງ ສປປ ລາວ ໄດ້ມີຜົນສຳເລັດອັນສຳຄັນ ແລະ ມີບາດກ້າວທີ່ຕໍ່ເນື່ອງ,ໝັ້ນທ່ຽງ. ສົກປີ 2010- 2011 ໄດ້ 8,1%, ລາຍຮັບສະເລ່ຍຕໍ່ຫົວຄົນບັນລຸໄດ້ 1.171 ໂດລາ, ເສດຖະກິດມະຫາພາກມີຄວາມໝັ້ນທ່ຽງໂດຍພື້ນຖານ, ການແກ້ໄຂຄວາມທຸກຍາກຂອງປະຊາຊົນຕິດພັນກັບການສ້າງບ້ານ ແລະ ກຸ່ມບ້ານພັດທະນາໄດ້ຮັບຜົນດີໃນຫລາຍດ້ານ, ຄອບຄົວທຸກຍາກໃນທົ່ວປະເທດຫລຸດລົງຈາກ 27,7% ໃນປີ 2002-2003 ມາເປັນ 18,77% ໃນປີ 2010- 2011.
ດ້ານກະສິກຳ ການຜະລິດເຂົ້າໃນສົກປີ 2010-2011 ໄດ້ 3,21 ລ້ານໂຕນ ເຊິ່ງສາມາດຕອບສະ ໜອງການບໍລິໂພກໄດ້ໂດຍພື້ນ ຖານ, ການຜະລິດພືດເປັນສິນຄ້າກໍມີຫລາຍຊະນິດເຊັ່ນ: ສາລີ, ມັນ ຕົ້ນ, ອ້ອຍ ແລະ ກາເຟ ເຊິ່ງສະເລ່ຍແຕ່ລະປີໄດ້ 45.194 ໂຕນ, ການປູກຕົ້ນໄມ້ອຸດສາຫະກຳ ເປັນຕົ້ນຢາງພາລາ ແລະ ການຜະລິດພືດຜັກອື່ນໆ ລ້ວນແຕ່ຂະ ຫຍາຍຕົວຢ່າງແຂງແຮງ, ການລ້ຽງສັດແບບເປັນຟາມໄດ້ມີຈຳ ນວນເພີ່ມຂຶ້ນຢ່າງໄວວາ.
ດ້ານພະລັງງານ ແລະ ບໍ່ແຮ່ ມີການພັດທະນາທີ່ຕັ້ງໜ້າ, ໄຟຟ້າສະເລ່ຍເພີ່ມຂຶ້ນ 15,6% ຕໍ່ປີ. ປັດ ຈຸບັນຢູ່ປະເທດເຮົາມີເຂື່ອນໄຟຟ້າທັງໝົດ 16 ແຫ່ງ ສາມາດຜະລິດພະລັງງານໄຟຟ້າໄດ້ທັງໝົດ 2.561 ເມກາວັດ ແລະ ສາມາດສະໜອງກະແສໄຟຟ້າໃຫ້ທຸກໆເທ ສະບານແຂວງ ແລະ ເມືອງ, ປະ ຊາຊົນໄດ້ໃຊ້ໄຟຟ້າ 78,9% ຂອງຄອບຄົວທັງໝົດໃນທົ່ວປະເທດ, ບໍ່ແຮ່ເພີ່ມຂຶ້ນ 15-20% ຕໍ່ປີ.
ດ້ານອຸດສາຫະກຳ ແລະ ການຄ້າ ລວມຍອດມູນຄ່າເພີ່ມຂອງຂະແໜງອຸດສາຫະກຳປຸງແຕ່ງໄດ້ຂະຫຍາຍຕົວໃນອັດຕາສະເລ່ຍ 9,4% ຕໍ່ປີ. ຮອດປີ 2011 ມີໂຮງງານອຸດສາຫະກຳ ແລະ ຫັດ ຖະກຳປຸງແຕ່ງ 37.960 ແຫ່ງ. ຂະແໜງຫັດຖະກຳມີບາດກ້າວຂະ ຫຍາຍຕົວໄວ ສາມາດຈຳໜ່າຍຜະລິດຕະພັນຫັດຖະກຳເພີ່ມຂຶ້ນ ປະມານ 7,8% ຕໍ່ປີ.
ດ້ານການຄ້າ ໄດ້ມີການຂະ ຫຍາຍຕົວຢ່າງກວ້າງຂວາງ, ທົ່ວປະເທດມີຕະຫລາດທັງໝົດກວ່າ 628 ແຫ່ງ, ໃນນັ້ນ ຕະຫລາດໃຫຍ່ 73 ແຫ່ງເຊິ່ງໄດ້ເຮັດໃຫ້ການຈໍລະ ຈອນແຈກຢາຍສິນຄ້າລົງເຖິງຊົນ ນະບົດ, ເຂດຫ່າງໄກສອກຫລີກ.
ດ້ານການຄົມມະນາຄົມຂົນສົ່ງ ໄດ້ຮັບການປັບປຸງແລະຂະຫຍາຍ ຕົວຫລາຍສົມຄວນ, ມີເສັ້ນທາງທີ່ເຊື່ອມຕໍ່ກັບອະນຸພາກພື້ນ, ເສັ້ນ ທາງແລວເສດຖະກິດຕາເວັນອອກ-ຕາເວັນຕົກ, ມີເສັ້ນທາງໄປເຂດຈຸດສຸມ, ໄປເຖິງທຸກແຂວງ, ທຸກເມືອງ, ບ້ານ ແລະ ກຸ່ມບ້ານ, ມີທາງລົດໄຟ ລວມຄວາມຍາວທັງໝົດ 37.768 ກິໂລແມັດ, ໃນນັ້ນມີທາງປູຢາງໄປເຖິງ 87 ເມືອງ. ພິເສດມີຂົວຂ້າມແມ່ນ້ຳ ຂອງທີ່ສ້າງແລ້ວ 4 ແຫ່ງ.
ດ້ານໄປສະນີ-ໂທລະຄົມມະນາ ຄົມ ແຕ່ລະເມືອງສາມາດນຳໃຊ້ໂທລະສັບໄດ້ 100%. ນອກຈາກນັ້ນ ມີຕາຄ່າຍໄຟຟ້າ, ລະບົບຊົນ ລະປະທານ, ສະໜາມບິນ ແລະ ອື່ນໆ ໄດ້ກາຍເປັນແຮງສະໜັບ ສະໜູນທາງກົງ ແລະ ທາງອ້ອມໃຫ້ແກ່ການຜະລິດ, ການຂົນສົ່ງ, ການຄ້າ-ການລົງທຶນ, ການທ່ອງ ທ່ຽວ ແລະ ການດຳລົງຊີວິດຂອງປະຊາຊົນ.
ຂະແໜງການທ່ອງທ່ຽວ ສົກປີ 2010-2011 ມີນັກທ່ອງທ່ຽວເຂົ້າ ມາລາວ 2,95 ລ້ານຄົນ ທຽບໃສ່ໄລຍະດຽວກັນຂອງສົກປີ 2009- 2010 ເພີ່ມຂຶ້ນ 45% ເຫັນໄດ້ວ່າຈຳນວນນັກທ່ອງທ່ຽວເຂົ້າມາ ລາວ ໂດຍສະເພາະນັກທ່ອງທ່ຽວສາກົນມີທ່າອ່ຽງເພີ່ມຂຶ້ນ.
ດ້ານວັດທະນະທຳ-ສັງຄົມ ໄດ້ຮັບການພັດທະນາຢ່າງຕໍ່ເນື່ອງເຊັ່ນ: ການສຶກສາໄດ້ຮັບການພັດ ທະນາເປັນກ້າວໆ, ທົ່ວປະເທດມີໂຮງຮຽນປະຖົມ 8.902 ແຫ່ງ ກວມເຖິງ 94%, ມັດທະຍົມ 1.329 ແຫ່ງ, ໂຮງຮຽນອະຊີວະສຶກສາມີຢູ່ທຸກແຂວງ, ມະຫາວິທະຍາໄລມີຢູ່ທຸກພາກ ແລະ ຍັງມີສູນເຝິກອົບ ຮົມຕ່າງໆ. ອັດຕາການຮູ້ໜັງສືຂອງປະຊາກອນກຸ່ມອາຍຸ 15 ປີຂຶ້ນໄປມີ 80%. ມີເມືອງທີ່ປະກາດລຶບລ້າງຈົບຊັ້ນປະຖົມບຳລຸງ 95 ເມືອງ ແລະ 2 ແຂວງ (ນະຄອນ ຫລວງວຽງຈັນ ແລະ ແຂວງຈຳ ປາສັກ); ດ້ານສາທາລະນະສຸກ ຕາໜ່າງສາທາລະນະສຸກໄດ້ຂະ ຫຍາຍຕົວໄປເຖິງກຸ່ມບ້ານ ປະຊາ ຊົນໄດ້ໃຊ້ນ້ຳສະອາດກວມ 79,5%, ໃຊ້ວິດຖ່າຍ 55% ຂອງຈຳນວນຄອບຄົວທັງໝົດ. ອາຍຸຍືນສະເລ່ຍຂອງຄົນລາວແມ່ນ 64,7 ປີ (ແມ່ຍິງປະມານ 66,7 ປີ ແລະ ຜູ້ຊາຍປະມານ 62,7 ປີ); ດ້ານແຮງງານ-ສະຫວັດດີການສັງຄົມ ການພັດທະນາສີມືແຮງງານໄດ້ດຳເນີນຢ່າງຕໍ່ເນື່ອງ, ທົ່ວປະເທດມີສູນພັດທະນາສີມືແຮງງານ ແລະ ສູນວິຊາຊີບທັງໝົດ 153 ແຫ່ງ ເຊິ່ງສາມາດເຝິກອົບ ຮົມໄດ້ຫລາຍໝື່ນຄົນ, ຈັດຫາວຽກເຮັດງານທຳໃຫ້ແຮງງານລາວໄດ້ຫລາຍແສນຄົນ. ປະຕິບັດນະໂຍບາຍຕໍ່ພະນັກງານປະຕິວັດອາວຸໂສທີ່ມີຄຸນງາມຄວາມດີຕໍ່ການປະຕິວັດໃນເປົ້າໝາຍຕ່າງໆໄດ້ທັງໝົດ 19.290 ທ່ານ. ສຳເລັດການສ້າງສຸສານນັກຮົບປະຕິວັດ ແລະ ນັກຮົບນິລະນາມ; ດ້ານຖະແຫລງຂ່າວ ແລະ ວັດທະນະທຳ ມີສະຖານີວິທະຍຸກະຈາຍສຽງ 54 ແຫ່ງສາມາດແຜ່ຄື້ນກະຈາຍສຽງ ກວມເອົາ 90% ຂອງເນື້ອທີ່ທົ່ວປະເທດ, ສະຖານີໂທລະພາບ 45 ແຫ່ງ ສາມາດກະຈາຍພາບໄດ້ 70% ຂອງເນື້ອທີ່ທົ່ວປະເທດ, ມີໜັງສືພິມ ແລະ ວາລະສານ 106 ກວ່າສະບັບ, ມີບ້ານວັດທະນະທຳ 2.070 ບ້ານ ກວມເອົາ 23,52% ຂອງຈຳນວນບ້ານທັງໝົດ, ມີຄອບຄົວວັດທະນະທຳ 417.797 ຄອບຄົວ ກວມເອົາ 41,30% ຂອງຄອບຄົວທັງໝົດ.
ວຽກງານຍຸຕິທຳ ພວກເຮົາມີກົດໝາຍທັງໝົດ 94 ສະບັບ ນັບທັງລັດຖະທຳມະນູນ, ລັດຖະບັນ ຍັດ 20 ສະບັບ, ດຳລັດ 143 ສະ ບັບ ແລະ ນິຕິກຳອື່ນໆ 189 ສະ ບັບ; ດ້ານການພົວພັນຮ່ວມມືກັບຕ່າງປະເທດ ການພົວພັນຮ່ວມກັບບັນດາປະເທດເພື່ອນມິດຍຸດທະສາດ ໂດຍສະເພາະກັບ ສສ ຫວຽດນາມ ແລະ ສປ ຈີນ ໄດ້ຮັບການປັບປຸງໃຫ້ມີປະສິດທິຜົນສູງຂຶ້ນ ແລະ ໄດ້ຮັບການເສີມຂະ ຫຍາຍທັງທາງກ້ວາງ ແລະ ທາງເລິກ, ທັງມີຄວາມໄວ້ເນື້ອເຊື່ອໃຈກັນຢ່າງໜັກແໜ້ນ ແລະ ໄດ້ຮັບການຍົກລະດັບຂຶ້ນສູ່ອັນໃໝ່. ສປປ ລາວ ໄດ້ເຄື່ອນໄຫວຢ່າງຕັ້ງໜ້າໃນຂອບການຮ່ວມມືຂອງອະນຸພາກພື້ນ, ພາກພື້ນ ແລະ ສາ ກົນ ໂດຍສະເພາະການຮ່ວມມືກັບອາຊຽນ, ການຮ່ວມມືລະຫວ່າງອາຊຽນກັບຄູ່ເຈລະຈາ. ປະເທດເຮົາໄດ້ເປັນເຈົ້າພາບຈັດກອງປະຊຸມລັດພາຄີສົນທິສັນຍາອົດສ໌ໂລ ວ່າດ້ວຍການເກືອດຫ້າມລະເບີດລູກຫວ່ານ (ບົ່ມບີ້) ເທື່ອທຳອິດຂອງໂລກ ແລະ ກອງປະຊຸມສຸດຍອດ ອາຊີ-ເອີຣົບ ຄັ້ງທີ 9 ຢ່າງມີຜົນສຳເລັດ. ການຮ່ວມມືເສດຖະກິດກັບປະເທດເພື່ອນມິດ ແລະ ອົງການຈັດຕັ້ງສາກົນໄດ້ຮັບການເສີມຂະຫຍາຍນັບມື້ນັບດີຂຶ້ນ; ສປປ ລາວ ໄດ້ເຂົ້າເປັນສະ ມາຊິກອົງການການຄ້າໂລກ ໃນວັນທີ 26 ຕຸລາ 2012, ລະດັບການເຊື່ອມໂຍງຂອງປະເທດເຮົາກັບສາກົນກໍເພີ່ມຂຶ້ນ. ປັດຈຸບັນ ສປປ ລາວ ມີການພົວພັນການທູດກັບ 135 ປະເທດ ແລະ ມີການພົວພັນດ້ານເສດຖະກິດກັບ 50 ກວ່າປະເທດ ຍ້ອນມີການພົວພັນຮ່ວມມືດັ່ງກ່າວນັ້ນ ຈຶ່ງເຮັດໃຫ້ ສປປ ລາວ ມີບົດບາດເພີ່ມຂຶ້ນໃນເວທີສາກົນ ແລະ ພາກພື້ນ.
ວຽກງານປ້ອງກັນຊາດ-ປ້ອງກັນຄວາມສະຫງົບ ປະເທດເຮົາໄດ້ຮັບການຍ້ອງຍໍຊົມເຊີຍຈາກສາກົນວ່າເປັນປະເທດທີ່ມີສະ ຖຽນລະພາບດ້ານການເມືອງໜັກແໜ້ນ, ສັງຄົມມີຄວາມປອດໄພ ແລະ ມີຄວາມເປັນລະບຽບຮຽບ ຮ້ອຍໂດຍພື້ນຖານ, ປະຊາຊົນມີນ້ຳໃຈເອື້ອເຟື້ອ ແລະ ມີໄມຕີຈິດ, ເປັນປະເທດທີ່ສະຫງົບ ແລະ ໜ້າທ່ອງທ່ຽວ.
ສືບຕໍ່ເສີມຂະຫຍາຍມູນເຊື້ອ 2 ທັນວາ ເຂົ້າໃນການຈັດຕັ້ງປະຕິ ບັດວຽກງານຈຸດສຸມໃນຕໍ່ໜ້າ ຕັ້ງໜ້າສຶກສາອົບຮົມການເມືອງ-ນຳພາແນວຄິດພະນັກງານ, ສະ ມາຊິກພັກ ແລະ ປະຊາຊົນບັນດາເຜົ່າໃຫ້ເຊີດຊູນ້ຳໃຈຮັກຊາດ ເອ ກະລາດ ເປັນເຈົ້າຕົນເອງ ສ້າງຄວາມເຂັ້ມແຂງດ້ວຍຕົນເອງ ເພື່ອສ້າງປະເທດຊາດໃຫ້ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ ສັງຄົມມີຄວາມສາມັກຄີປອງດອງ, ຍຸຕິທຳ ແລະສີວິໄລ; ຄະນະ ພັກ, ຄະນະໂຄສະນາອົບຮົມທຸກ ຂັ້ນຕ້ອງເພີ່ມຄວາມເອົາໃຈໃສ່ຕໍ່ວຽກງານການເມືອງ-ແນວຄິດໃຫ້ມີຄຸນນະພາບສູງຂຶ້ນ ໂດຍການປັບປຸງເນື້ອໃນ ແລະ ວິທີການໃຫ້ເໝາະສົມ ແລະ ແທດເຖິງຕົວຈິງ, ບໍ່ເຮັດແບບລັກສະ ນະຮູບການ, ແຫ້ງກະດ້າງ, ຂາດຄວາມມີຊີວິດຊີວາ. ຕ້ອງເອົາວຽກງານໂຄສະນາສຶກສາອົບຮົມຕິດພັນກັບວຽກງານພັດທະນາເສດຖະກິດ-ສັງຄົມ ແລະ ຕິດພັນກັບວຽກງານ 3 ສ້າງຢ່າງແທ້ຈິງ. ຕ້ອງເພີ່ມງົບປະມານໃຫ້ແກ່ວຽກງານດັ່ງກ່າວໃຫ້ສົມຄູ່ກັບຄວາມສຳຄັນຂອງມັນ.
ຕັ້ງໜ້າປຸກລະດົມຂະບວນການເຄື່ອນໄຫວຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກ ແລະ ແຜນພັດທະນາເສດຖະກິດ-ສັງ ຄົມຂອງລັດໃຫ້ປາກົດຜົນເປັນຈິງ ເພື່ອບັນລຸເປົ້າໝາຍສະຫັດສະວັດດ້ານການພັດທະນາໃນແຕ່ລະດ້ານ. ສິ່ງສຳຄັນຕ້ອງຮັບປະກັນໃຫ້ເສດຖະກິດມີການເຕີບໃຫຍ່ຢ່າງຕໍ່ເນື່ອງ, ເສດຖະກິດມະຫາພາກມີຄວາມໝັ້ນທ່ຽງ, ອັດຕາເງິນເຟີ້ ແລະ ລາຄາສິນຄ້າທີ່ເພີ່ມຂຶ້ນໃຫ້ຫລຸດລົງ, ຮັບປະກັນໃຫ້ຄ່າຄອງຊີບ ແລະ ຊີວິດການເປັນຢູ່ຂອງພະນັກງານ, ທະຫານ, ຕຳ ຫລວດ ແລະ ປະຊາຊົນເປັນປົກ ກະຕິ.
ຕັ້ງໜ້າປະຕິບັດວຽກງານກໍ່ ສ້າງຮາກຖານການເມືອງ ພັດທະ ນາຊົນນະບົດ, ຍູ້ແຮງຂະບວນ ການ 3 ສ້າງ (ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບ ດ້ານ, ສ້າງບ້ານເປັນຫົວໜ່ວຍພັດທະນາ) ໃຫ້ເປັນຈິງ. ໃນສົກປີ 2011-2012 ເອົາໃຈໃສ່ປະຕິບັດບັນດາວຽກຈຸດສຸມດັ່ງນີ້: ສຸມໃສ່ການສ້າງບ້ານໃຫ້ເປັນຫົວໜ່ວຍພັດທະນາ ໂດຍການປັບປຸງ ແລະ ສ້າງຄວາມເຂັ້ມແຂງໃຫ້ແກ່ອົງ ການປົກຄອງບ້ານ ຢາກເຮັດໄດ້ແນວນັ້ນ ຕ້ອງເອົາໃຈໃສ່ປະຕິບັດທິດຊີ້ນຳຂອງເລຂາທິການໃຫຍ່ທີ່ວ່າ: “ຕ້ອງສ້າງຊາວຊົນນະບົດໃຫ້ເປັນເຈົ້າຊົນນະບົດ, ຕ້ອງສ້າງນັກຮົບແຂ່ງຂັນພັດທະນາຊົນນະ ບົດເພື່ອພັດທະນາຊົນນະບົດໃຫ້ມີຜົນສຳເລັດ, ຕ້ອງສ້າງພັດທະນາກອນກັບທີ່ເພື່ອພັດທະນາບ້ານຊ່ອງໃຫ້ມີຜົນສຳເລັດ”; ສຸມໃສ່ພັດທະນາພື້ນຖານໂຄງລ່າງ ແລະ ວັດຖຸເຕັກນິກທີ່ຈຳເປັນໃຫ້ຊົນນະ ບົດເຊັ່ນ: ເສັ້ນທາງ, ໄປສະນີໂທ ລະຄົມ, ຕາໜ່າງໄຟຟ້າ, ຊົນລະປະທານ, ການບໍລິການສິນເຊື່ອ, ການສະໜອງຂໍ້ມູນ ແລະ ອື່ນໆ; ພັດທະນາ ແລະ ປັບປຸງວຽກງານການສຶກສາ, ສາທາລະ ນະສຸກ ແລະ ວັດທະນະທຳ-ສັງ ຄົມຢູ່ຊົນນະບົດໃຫ້ມີຄວາມສະ ດວກ ແລະ ມີຄຸນນະພາບ; ຫັນເອົາພະນັກງານຂະແໜງການຕ່າງໆລົງສູ່ຮາກຖານພາປະຊາ ຊົນເຮັດຕົວຈິງ. ສຳຄັນທີ່ສຸດແມ່ນຈະຕ້ອງໄດ້ເຮັດທົດລອງວຽກງານ 3 ສ້າງຢູ່ 51 ເມືອງ ແລະ 105 ບ້ານ ທີ່ໄດ້ກຳນົດເປັນບ່ອນທົດລອງ; ປຸກລະດົມຂົນຂວາຍ ແລະ ຍາດແຍ່ງການຊ່ວຍເຫລືອຈາກກຳລັງພາຍໃນ ແລະ ຕ່າງ ປະເທດ ເພື່ອຊ່ວຍຊົນນະບົດ; ເພີ່ມທະວີຄວາມສາມັກຄີປອງດອງຂອງປະຊາຊົນລາວບັນດາເຜົ່າ ພາຍໃຕ້ການນຳພາຂອງພັກ, ເອົາໃຈໃສ່ຈຳກັດແກ້ໄຂປາກົດ ການຫຍໍ້ທໍ້ຕ່າງໆໃນສັງຄົມ, ສ້າງບັນຍາກາດສົດໃສ, ສະຫງ່າຜ່າເຜີຍຂອງສັງຄົມລາວ ແລະ ຄົນລາວ ເຮັດໃຫ້ປະເທດຊາດມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ; ຢຶດໝັ້ນແນວທາງການຕ່າງປະເທດ ສັນຕິ ພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນ ສະເໝີປາຍ, ສົ່ງເສີມການພົວພັນຮ່ວມມືກັບຕ່າງປະເທດແບບຫລາຍທິດ ແລະ ຫລາຍຝ່າຍ, ຫລາຍລະດັບ ແລະ ຫລາຍຮູບແບບ ບົນພື້ນຖານຫລັກການເຄົາ ລົບເຊິ່ງກັນ ແລະ ກັນ, ຕ່າງຝ່າຍຕ່າງມີຜົນປະໂຫຍດ. ສືບຕໍ່ຮັດແໜ້ນສາຍພົວພັນມິດຕະພາບ ແລະ ການຮ່ວມມືກັບປະເທດເພື່ອນມິດຍຸດທະສາດ, ຮ່ວມອຸດົມການ ເປັນຕົ້ນຄວາມສາມັກຄີພິເສດກັບ ສສ ຫວຽດນາມ ແລະ ການພົວພັນຮ່ວມມືຮອບດ້ານກັບ ສປ ຈີນ. ເອົາໃຈໃສ່ຊຸກຍູ້ຂະບວນ ການສະເຫລີມສະຫລອງປີສາ ມັກຄີມິດຕະພາບ ລາວ-ຫວຽດ ນາມ 2012 ນີ້ ໃຫ້ມີຜົນສຳເລັດອັນຈົບງາມ ເປັນຕົ້ນການເຂົ້າ ຮ່ວມກິດຈະກຳຕ່າງໆເຊັ່ນ: ການແຂ່ງຂັນຂຽນບົດ, ຖາມ-ຕອບ, ງານພົບປະ, ສຳມະນາ, ແຕ້ມຮູບ, ວາງສະແດງ, ຄາລາວານລົດ ຕາມຮ່ອງຮອຍປະຫວັດສາດ ແລະ ອື່ນໆ.
No comments:
Post a Comment