ພາຍຫລັງຄະນະຜູ້ແທນສະພາການຄ້າ ແລະ ອຸດສາຫະກຳເມືອງກາວາຊາກິ ຂອງຍີ່ປຸ່ນ 52 ທ່ານໄດ້ມາຢ້ຽມຢາມລາວໃນລະຫວ່າງວັນທີ 25-28 ພະຈິກນີ້ ເຊິ່ງນຳໂດຍທ່ານ ໂອຊາມິຊຶ ຢາມາດະ ຫົວໜ້າສະພາການຄ້າ ແລະ ອຸດສາຫະກຳເມືອງກາວາຊາກິ ເຊິ່ງຄະນະຜູ້ແທນດັ່ງ ກ່າວໄດ້ເຂົ້າຢ້ຽມຂ່ຳນັບທ່ານ ສົມສະຫວາດ ເລັ່ງສະຫວັດ ຮອງນາ ຍົກລັດຖະມົນຕີ, ທ່ານ ນາມ ວິຍາເກດ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ, ທ່ານ ສົມດີ ດວງດີ ລັດຖະມົນຕີວ່າການກະຊວງແຜນການ ແລະ ການລົງ ທຶນ ໂດຍໃນລະຫວ່າງການເຂົ້າຢ້ຽມຂ່ຳນັບການນຳລະດັບສູງຂອງລາວ ຄືດັ່ງກ່າວນັ້ນ, ຄະນະຜູ້ແທນຍີ່ປຸ່ນກໍໄດ້ຮັບຟັງການອະ ທິບາຍໂດຍຫຍໍ້ກ່ຽວກັບສະພາບການຂະຫຍາຍຕົວທາງເສດຖະ ກິດຂອງລາວ ໂດຍສະເພາະສະ ພາບການລົງທຶນ ເຊິ່ງມາຮອດປັດຈຸບັນ, ສປປ ລາວ ໄດ້ມີການປັບປຸງນິຕິກຳນະໂຍບາຍຕ່າງໆທີ່ກ່ຽວພັນກັບການລົງທຶນ ແລະ ຈັດສັນພື້ນຖານໂຄງລ່າງເຂດທີ່ມີທ່າແຮງ ເພື່ອສ້າງເງື່ອນໄຂອັນສະດວກໃຫ້ແກ່ນັກລົງທຶນ, ຫລັງຈາກນັ້ນ ທ່ານ ໂອຊາມິຊຶ ໄດ້ສະແດງຄວາມຂອບໃຈຕໍ່ການນຳຂັ້ນສູງຂອງລາວທີ່ໄດ້ໃຫ້ກຽດຕ້ອນຮັບຄະນະຜູ້ແທນຍີ່ປຸ່ນຢ່າງອົບອຸ່ນ ພ້ອມກັບຢືນຢັນວ່າ: ນັກ ທຸລະກິດຍີ່ປຸ່ນມີຄວາມສົນໃຈຢາກມາ
ລົງທຶນຢູ່ລາວໃນຫລາຍຂະແໜງ ເປັນຕົ້ນດ້ານອະສັງຫາ ລິມະຊັບ, ຕັດຫຍິບ, ໂຮງງານຜະລິດອາໄຫລ່ລົດ, ໂຮງແຮມ ແລະ ອື່ນໆ. ໃນໂອກາດນີ້, ທ່ານ ໂອຊາມິຊຶ ຫົວໜ້າສະພາການຄ້າ ແລະ ອຸດ ສາຫະກຳເມືອງກາວາຊາກິ ແລະ ທ່ານ ກິດສະໜາ ວົງໄຊ ປະທານສະພາການຄ້າ-ອຸດສາຫະກຳແຫ່ງຊາດລາວ ໄດ້ເຊັນລົງນາມບົດບັນທຶກຄວາມເຂົ້າໃຈກ່ຽວກັບການຮ່ວມມືສອງຝ່າຍ ໂດຍໃນນີ້ສະພາການຄ້າ ແລະ ອຸດສາຫະ ກຳຍີ່ປຸ່ນເຫັນດີໃຫ້ການຊ່ວຍເຫລືອດ້ານເຕັກນິກວິຊາການກ່ຽວກັບຂົງເຂດເສດຖະກິດແກ່ລາວ ເພື່ອປະກອບສ່ວນຊຸກຍູ້ສົ່ງເສີມ ແລະ ສ້າງຄວາມເຂັ້ມແຂງໃຫ້ແກ່ຂົງເຂດເສດຖະກິດຂອງລາວສາມາດແຂ່ງຂັນກັບສາກົນໄດ້.
ເມືອງກາວາຊາກິເປັນເມືອງທີ່ມີພື້ນຖານອຸດສາຫະກຳການຜະລິດທີ່ມີເຕັກນິກສູງ ແລະ ເປັນພື້ນຖານສຳຄັນທີ່ຊຸກດັນການຂະຫຍາຍເສດຖະກິດຂອງປະເທດຍີ່ປຸ່ນ.
ຂ່າວຍັງໃຫ້ຮູ້ອີກວ່າ: ທ່ານ ໂອ ຊາມິຊຶ ຢາມາດະ ຫົວໜ້າສະພາການຄ້າ ແລະ ອຸດສາຫະກຳເມືອງກາວາຊາກິ ຍັງເປັນປະ ທານມູນນິທິສົ່ງເສີມການສຶກສາຢາມາດະ ຍີ່ປຸ່ນ ເຊິ່ງໃນໄລຍະ 15 ປີຜ່ານມາ ມູນນິທິດັ່ງກ່າວໄດ້ໃຫ້ທຶນການສຶກສາແກ່ນັກສຶກສາມະ ຫາວິທະຍາໄລດົງໂດກຫລາຍກວ່າ 300 ຄົນ ແລະ ການຢ້ຽມ ຢາມລາວເທື່ອນີ້ ແມ່ນເທື່ອທຳອິດຂອງທ່ານ ໂອຊາມິຊຶ ພ້ອມດ້ວຍນັກທຸລະກິດຍີ່ປຸ່ນຄະນະໃຫຍ່.
No comments:
Post a Comment